gselaci.wordpress.com

E keqja më e vogël nuk është ajo që na duhet

In Kosova on 19 June, 2014 at 07:50

Gëzim Selaci

 

Lajm i mirë, lajm i keq

E mira e demokracisë përfaqësuese është se mundëson ndërrimin e qeverisë herë pas here, duke mos lejuar aq gjatë të njëjtit njerëz në krye të vendit sa të mund të shndërroheshin në despotë. Në këtë kuptim, mendoj se është gjë e mirë që pozita e deridjeshme në zgjedhjet e përgjithshme të këtij viti 2014 nuk ka marr mbështetje aq të gjerë sa të mund të formojë qeverinë për herë të tretë pa kurrfarë vështirëse e të qeverisë vendin edhe për një mandat duke mos çarë kokën për qytetarët, hallet dhe kërkesat e tyre.

Mirëpo, nuk mund të them se u gëzova që koalicioni opozitar po pretendon të formojë qeverinë e re. Kjo, jo për arsye se e fut vendin në një aventurë të pasigurt shtyrjesh politike nga e cila nuk do të kursehet as interpretimi zyrtar i Kushtetutës së Republikës. Kjo do të karakterizohet kryekëput me luftë për pushtet ndërmjet partive, e aspak nuk do të preokupohet me ofrimin e qeverisjes alternative në të mirë të qytetarëve dhe demokracisë. As, sepse, po që se koalicioni do t’ia dilte, do të krijohej një mishmash koalicion që do të rezultonte në qeveri të paqëndrueshme e që vështirë se do të funksiononte, për arsye të ndryshme…

Në të vërtetë, përse nuk gjeta arsye të pres me gëzim këtë koalicion është se, nëse rezulton i suksesshëm, partitë opozitare do të futen në një gjendje vetëmashtruese e ta gënjejnë vetveten se kanë legjitimitetin demokratik për të udhëhequr vendin edhe kështu si janë, pa pasur nevojë të reformohen vetë dhe të rishikojnë e zhvillojnë programet  e tyre. Veç kësaj, kjo do t’i jepte sinjal të rrezikshëm krijimit të qeverive në të ardhmen sipas këtij modeli që mbledh disa parti me numër të vogël votash për të krijuar një koalicion pas zgjedhjeve, që jo medoemos i bashkon një filozofi politike a ngjashmëritë në programe, por dakordimi i tyre për të ndarë postet qeveritare.

Sado që më trishton nëse një parti (cilado qoftë ajo), fiton mandatin e tretë për të udhëhequr vendin, në të njëjtën kohë mendoj se as opozita që e kemi tash për tash nuk është e gatshme të na ofrojë një alternativë qeverisëse. Dhe ka disa arsye për të besuar këtë. Së pari, disa parti që po vetëquhen opozitë, në të vërtetë, nuk përbëjnë opozitë reale, por dallimi i vetëm ndërmjet tyre dhe pozitës është se nuk janë në pushtet. Këtë e kanë dëshmuar gjatë këtyre viteve të fundit duke mos kryer as për së afërmi rolin që pritet ta kryejnë partitë opozitare në demokraci. Së dyti, koalicioni i opozitës nuk bazohet mbi një marrëveshje ku specifikohet se për çfarë programi qeverisës janë, por i kemi parë se qysh nga fillimi kanë negocuar vetëm për poste politike. Ky është pra një koalicion që ngritet mbi ndarjen e posteve, e jo mbi një filozofi apo program alternativ qeverisjeje.

Një pjesë tjetër e partive që do të mund të quheshin opozitë reale, kanë nevojë të mendojnë se ku dështuan dhe si të rrisin elektoratin e tyre. Por, jo vetëm të krijojnë strategji propaganduese, por të përshtatin pozicionimet dhe programet e tyre, sikurse dhe përbërjen e tyre, për t’i kthyer dinjitetin qytetarëve dhe për të nxjerrë vendin nga krizat që po shtresëzohen njëra-mbi tjetrën.

Ku është e keqja më e vogël?

Komentues të ndryshëm e kanë pritë me entuziazëm krijimin e koalicionit opozitar që synon të formojë qeverinë e ardhshme, jo për tjetër, por se ky koalicion po e pamundëson vazhdimin në pushtet të një partie e cila për dy mandate e ka çuar vendin në mjerim ekonomik, coptuar shtetin në entitete etnike, forcuar autoritarizmin dhe shtënë nën kontrollin e saj institucionet kyçe publike duke minuar kështu autonominë e shoqërisë civile përmes një rrjeti klientelist e formave të ndryshme të detyrimeve.

I kuptoj arsyet e zemërimit në qeverinë e deritanishme dhe druajtjes që kjo qeveri të vazhdojë. Mirëpo, dua të theksoj se në plan më afatgjatë kjo nuk është në të mirë të demokracisë në vend. Shpresë nuk ka as te partitë opozitare. Ka arsye për të t’u merakosur nëse kjo qeveri do të ndërrohej me një tjetër e cila nuk është se ndryshon gjithaç nga paraprakja. Kjo do t’ia ulte vlerën idesë së ndërrimit të pushtetit, ngase ajo që do të ndërronte nuk do të ishte diçka thelbësore, domethënë qasja qeversisëse, programi politik, por vetëm emrat e partive dhe njerëzit në to. Kjo nuk është e dobishme as për partitë opozitare, ngase iu lejon me lehtësi të vijnë në pushtet pa pasur nevojë të punojnë shumë për të fituar përkrahjen e votuese dhe qytetarëve në përgjithësi.

Për qeverisje ndryshe, na duhet paguar një çmim 

Nuk mund të thuhet me aq lehtësi se kjo qeverisje do të ishte më pak e keqe se e mëparshmja, siç u bë e modës të besohet pa menduar, tash në këtë ambient të ndezjes së ndjenjave. Për më tepër, siç u përpoqa të arsyetoj, ka mundësi të madhe që kjo vetëm të fusë opozitën në një rrugë vetëmashtruese në të cilën nuk do ta ndienjë nevojën për të ndryshuar, rinuar e reformuar. Në vend të kësaj, mendoj se më së miri do të ishte që opozita të pranojë humbjen e të reflektojë për të me qëllim që të reformohet e të kthehet për të ofruar udhëheqje alternative.

Dua të the se për opozitën vetëdijësimi për humbjen e dështimin është më i mirë se sa të kaplohet nga vetëmashtrimi ngadhnjimtar që do ta verbojë para mangësive të dukshme që i ka. Kur e them këtë, jam i vetëdijshëm se vazhdimi i qeverisjes së njëjtë me partinë e njëjtë në krye e ka çmimin e vet për shoqërinë dhe vendin, por po them se nuk gjej ndonjë arsye të qëndrueshme për të besu se qeverisja e koalicionit opozitar do të jetë më pak e keqe.

Për një qeverisja ndryshe, na duhet paguar një çmim, se ajo nuk vjen falas. Ndonjëherë njeriu, që të dalë prej ujit, duhet të zhytet aq fort në ujë e ta prekë tokën që t’i jap përpjetë. Ndoshta jemi në një situatë kur na duhet e keqja më e madhe, në mënyrë që mund të presim më të mirën më të madhe në afat më të gjatë. Me qasjen “zgjidh të keqen më të vogël” të votës, ndërrimi i pushtetit nuk do të ketë kuptimin e plotë në shtetin tonë të ri.

Advertisements

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: